Concentración Antifacista: Fuera facistes de les cais.
40 años de dictadura, 30 años de "democracia"

20 payares 20:00 hores na plaza españa d'Uviéu
Entamen: FUSOA, BAF ASTURIES, CIZALLA, SOFITU, CALECER



Comunicau:

L’aumentu cuantitativu y cualitativu de les agresiones facistas n’Asturies nesti últimu añu (qu’incluyen el lanzamientu de bengales en llocales llenos de xente, delles agresiones con arma blanca o la proliferación de pegadielles y pintaes xenófobes, con esvástiques, céltiques y demás simboloxía lligada a los grupos neonazis) nos recuerda que’l facismu aprovéchase de la impunidá, el silenciu y l’olvidu. Casualmente les investigaciones policiales nun dieron resultáu en nenguna d’estes aiciones y nun hai naide acusáu d’elles, magar que los sos autores taben vinculaos a Democracia Nacional y a otros grupos neonazis perfeutamente identificaos.

Nós, nietos y nietes de presones represaliaes pol franquismu, fíos y fíes d’obreres explotaes, tamos dispuestes a recordar a los desmemoriaos qu’Asturies sigui siendo antifacista y que los faches nun son ni serán bien recibíos equí.

Alcórdemonos de lo socedío el 10 de Setiembre de 2005 en Cangues. Entós, la permisividá de la Dellegación de Gobiernu coles actividaes de la estrema derecha propició que neonazis llegaos de fuera d’Asturies protagonizaren una concentración na que glayaron conseñes de caráuter fascista y xenófobu, y amosaron simboloxía d’esaltación nazi y diversos tipos d’armes. Aquel día intentóse acallar la convocatoria popular de dellos coleutivos en repulsa a la cellebración del actu fascista con una carga sabaz de los antidisturbios de la guardia civil. 14 presones fueron deteníes, 8 sancionaes y dalgunes apaleaes sin miramientos, incluyíos vecinos de Cangues. Además, l’usu indiscrimináu de material antidisturbios (pelotes de goma) provocó numberosos daños en coches y escaparates.

Sin embargo, esti añu, gracies a la presión popular y a la inmediata reaición de los antifacistes asturianos, los nazis nun s’atrevieron a venir, aforrándonos el llamentable espectáculu de velos desplegar los sus símbolos facistes y vomitar la so basoria racista con total llibertá. Esta victoria correspuende al pueblu de Cangues y a tolos antifacistes que d’unu u otru mou amosamos la nuesa refuga a la presencia de facistes n’Asturies.

Pero nun poemos conformanos con echalos ca vegada qu’intenten venir. El siguiente pasu ye dexa-yos nidio que nun los queremos ni equí ni en nengún llugar. Por eso, convocámosvos el día 20 de Payares a les 8 de la tarde a una concentración na Plaza d’España d’Uviéu pa que se sienta el nuestru odiu al facismu y pa alvertir a Dellegación y a Trevín que nun vamos dexar que Democracia Nacional ni nenguna otra pandilla de neonazis actúe impunemente n’Asturies.

Tamién-yos queremos recordar a los partíos qu’apoyaron la llei de la memoria hestórica y que formen parte del gobiernu asturianu (PSOE, IU-BA) que l’alcordanza y la reparación a les víctimes casen muy mal cola permisividá de la que goza la estrema derecha pa organizar actos. Y al Ayuntamientu d’Uviéu y al so alcalde entrugamos-yos que si en Berlín nun queda ni un símbolu ni una cai que recuerde a Hitler y al nazismu, por qué n’Uviéu tenemos qu’enfrentanos al caretu de Franco o vivir en cais col nome de xenerales franquistas. Tala cosa supón un insultu a la memoria de tolos asturianos mataos o represaliaos pol franquismu y contravién la llei de la memoria hestórica aprobada pol Congresu.

Basta d’impunidá. Ni un facista más nes cais asturianas.

Agora y siempre, ¡Asturies antifacista!